श्रीडूंगरगढ़ टुडे 1 मार्च 2026
कस्बे रै ऊपरलै तेरापंथ भवन में श्रीडूंगरगढ़ रा प्रवासी ओसवाल समाज रै तीन दिन रै प्रीत पुराणी’ थीम कार्यक्रम रो आज फूटरो आगाज उद्घाटन सागै होयो। देस में आय’र होळी मनावण रै इण रंग रंगीले कार्यक्रम नै अनूठो कैयो जा सकै। कार्यक्रम मांय मौजूद सैकड़ों प्रवासी भाई-बैनां नै सम्बोधित करता थकां लाडला विधायक ताराचंद सारस्वत कैयो कै मैं थाँरै सूं की कोनी मांगूं, फगत इत्ती ई अरदास करस्यूँ के थे लोग अठै आवता रैवो। थे आस्यो तो श्रीडूंगरगढ़ सुंदर होवतो जासी। बां प्रवासियां नै जोर देय’र कैयो कै आपनै एक दिन थांरै पुरखां री धरती माथै आवणो ई पड़सी। आप कैयो कै इण कार्यक्रम रो नांव ‘प्रीत पुराणी’ राख्यो गयो है जिको घणो समीचीन है अर इणरो भोत ऊंडो अरथ निकळै। आप कैयौ कै स्हैर नै संभाळणो घणो जरूरी है। बै खुला सबदां में कैयो कै इण स्हैर री लारलै चाळीस बरसां में घणी गत बिगड़ी है। जिकी गळ्याँ चौड़ी-चौड़ी ही बै सांवकीजगी। अठै पार्क कोनी, पेड़ लगावां तो कठै लगावाँ। बाँ छैकड़ में एक बात माथै खास जोर दियो कै प्रवासी लोगां नै आपरी हेल्यां नीं बेचणी चाइजै।
अठै उद्घाटन कार्यक्रम मांय सांसद अर कानून मंत्री अर्जुनलाल मेघवाळ आवणवाळा हा, पण नूंवी अंतरराष्ट्रीय राजनीतिक स्थितियां रै कारण बै अठै पधार नीं सक्या, बै इण कार्यक्रम में विडीयो कान्फ्रेसिंग रै जरिये सामल होया अर कैयो कै ओ कार्यक्रम घणो सांतरो है। बाँ कार्यक्रम रै सफलता री कामना करी अर पैलां जैड़ो प्रेम सदाई कोनी रैवै भजन री कीं ओळ्यां गाय’र सुणाई। कार्यक्रम की देरी सूं सरू होयो । पैलीपोत भीखमचंद पुगलिया, कलकत्ता, आयोड़ा श्रीमंतां रो आभार ज्ञापन कर्यो। आप कैयो कै इण कार्यक्रम मांय एक व्यवस्थित आयोजना निजर आवै। इण कार्यक्रम सूं इण घरती रै प्रति प्रेम प्रगटै।विश्वकर्मा कौशल विकास बोर्ड रा अध्यक्ष रामगोपाल सुथार कैयो कै ओ ऐतिहासिक कार्यक्रम है। इण कार्यक्रम सूं श्रीडूंगरगढ री गरिमा में बधेपो होयो है। आपां रै मन मांय तनाव रैवै, पण इस्या प्रोग्राम तनाव मुक्त करै अर उछाव भरै। इण मौकै तहसीलदार श्रीवर्धन शर्मा च्यार मांग प्रवासी जणां रै मुंडागै राखतां कैयो कै पुराने बस स्टैण्ड माथै टीन शैड लागणो घणो जरूरी है। गांधी पार्क रो सौंदर्यकरण होवणो चाइजै। डाकणती तळाई कनै एक पार्क बणनो चाइजै अर राजस्व विभाग सारू एक विश्रांति भवन बणानै में प्रवासी भाई आपरो योगदान कर सकै। प्रीत पुराणी कार्यक्रम रा संयोजक श्री जतन पारख आयोजन री विस्तृत बात बतावतां कैयो कै ओ कार्यक्रम कई दिन री चिंतना रै पछै त्यार होयो। बां कैयो कै श्रीडूंगरगढ रै नांव सागै श्री लागै। आपांनै इण ‘श्री’ री लाज राखणी है। श्रीडूंगरगढ री गळ्यां बदलगी, पण आपांनै आपणी पुराणी प्रीत नै निभावणी है। अबार रा प्रवासी टाबर सावळसर आपरो घर कोनी ओळखै। कित्ता ई सहभागियां सूं तीस बरसाँ पछै मिलणो होय रैयो है। अबार इण कार्यक्रम रो उछाव इयांकलो रैयो कै अठै 82 स्टेसणां सूं 800 भाई- बैन भाग लेवण आया है। आप प्रशासन रै लोगां नै भरोसो दिरावतां कैयो कै है अठै आवता रैस्यां पण अठै हर बार बदलाव दीखणो चाइजै। हरेक प्रवासी आपरै गाँव सारू प्रेम राखै अर अठै बाँ रो कीं न कीं योगदान रैयो है। बां एक स्वरचित गीत भी सुणायो।
कार्यक्रम गाजै- बाजै सूं सरू होयो। सगळां रै गळै में दुपटा पैरा, तिलक कर स्वागत करयो गयो।
कार्यक्रम रो सांतरो संचालण पन्नालाल पुगलिया करयो। बां रै संचालण री प्रशंसा होई।छैकड़ में पुलिस महकमै रा अधिकारी निकेत पारीक आपरो उद्बोधन करयो।
